তিতাবৰত মাদক দ্ৰব্যৰ অবাধ প্ৰচলন : ৰাজপথত ওলাই আহিল মহিলা

তিতাবৰ : তিতাবৰৰ বিভিন্ন অঞ্চলত দিনক দিনে বৃদ্ধি পাইছে মাদক দ্ৰব্যৰ অবাধ প্ৰচলন৷ যাৰ ফলত বিভিন্ন সময়ত বহু কেইটা অপৰিস্থিতিকৰ ঘটনা সংঘটিত হোৱাৰ উপৰি কেইবাজনো লোকৰ প্ৰাণ হেৰুৱাব লগা হৈছে। সেয়ে আজি তিতাবৰত অসম জাতীয়তাবাদী যুৱ ছাত্ৰ পৰিষদৰ ভগ্নী সংগঠন জাতীয় মহিলা পৰিষদৰ তিতাবৰ আঞ্চলিক সমিতিয়ে তিতাবৰ সাপ্তাহিক বজাৰস্থিত কার্যালয়ৰ পৰা তিতাবৰ নগৰৰ মাজেদি এক প্ৰতিবাদী সমদল উলিয়াই তিতাবৰ চাৰিআলিত গড়আলি আৰু ধোদৰআলি পথ অৱৰোধ কৰি তিতাবৰ আবকাৰী বিভাগ হায় হায়, টকা লৈ ফুটা ড্ৰাম অনা বন্ধ কৰক, তিতাবৰৰ আবকাৰী বিভাগৰ অকমৰ্ণ্য বিষয়া কৰ্মচাৰীক দৃষ্টান্তমূলক শাস্তি প্ৰদান কৰক, তিতাবৰক মদমুক্ত অঞ্চল হিচাপে ঘোষণা কৰক আদি বিভিন্ন শ্লোগানৰে উত্তাল প্ৰতিবাদ সাব্যস্ত কৰে।
আনহাতে সংগঠনটোৱে তিতাবৰ আবকাৰী বিভাগে প্ৰতিমাহে দহ হেজাৰ টকাৰ বিনিময়ত অবৈধ চুলাই মদৰ ঘাটি চলাবলৈ অনুমোদন দিয়ে বুলিও গুৰুতৰ অভিযোগ উত্থাপন কৰে। উল্লেখযোগ্য যে কিছুদিনৰ পূৰ্বে চুলাই মদক কেন্দ্ৰ কৰি ২০০ টকাৰ বিনিময়ত তিতাবৰৰ বিবিজানত এগৰাকী মাতৃক নিজৰ পুত্ৰৰ হাতত প্ৰাণ দিব লগা হোৱা ঘটনাও সংঘটিত হৈছে। সেয়ে আজি জাতীয় মহিলা পৰিষদে তীব্ৰ প্ৰতিবাদ সাব্যস্ত কৰি তিতাবৰ মহকুমাধিপতিৰ যোগেদি অসম চৰকাৰৰ আবকাৰী মন্ত্ৰীলৈ এখন স্মাৰক পত্ৰ প্ৰেৰণ কৰি সকীয়াই দিয়ে যে যদিহে অনাগত ১৫ দিনৰ ভিতৰত তিতাবৰৰ বিভিন্ন অঞ্চলত থকা অবৈধ মদৰ ঘটিসমূহ উচ্ছেদ নকৰে তেনেহলে জাতীয় মহিলা পৰিষদে ইয়াতকৈ ভয়াবহ আন্দোলন গঢ়ি তুলিব।


SHARE THIS

No. 1 Web Media in North-East India. Maintained and Published by Saiyad Bulbul Jamanur Hoque on behalf of Save Media Solution (A unit of SAVE).

0 comments: