জন্মৰ পাছতে জ্যোতিষীয়ে কৰিছিল ভৱিষ্যৎ বাণী অসাধ্য সাধন কৰি দেশ-জাতিৰ নাম উজলাব হিমা দাসে


গুৱাহাটী : ইণ্ডোনেছিয়াৰ জাকাৰ্তাত অনুষ্ঠিত এছিয়ান গেমছত উজলি উঠা হিমাৰ সফলতাক লৈ নগাঁও জিলাত দেওবাৰে সন্ধ্যা উছাহৰ ধল বয়৷ হিমাৰ ধিঙৰ কান্ধুলিমাৰী গাঁৱৰ বাসভৱনত পুৱাৰে পৰা অগণন লোকৰ আগমন ঘটে৷ হিমাৰ বাসগৃহৰ সন্মুখত মহিলাসকলে নিৰৱচিছন্নভাৱে নাম-কীর্তন কৰি হিমাৰ সফলতাৰ বাবে ভগৱানৰ ওচৰত প্রার্থনা জনায়৷ বিয়লি হিমাৰ খেল উপভোগ কৰিবৰ বাবে তেওঁৰ ঘৰৰ চোতালত প্রজেক্টৰৰ ব্যৱস্থাও কৰা হয়৷

বিশাল প্রজেক্টৰত হিমাৰ খেল উপভোগ কৰিবলৈ তেওঁলোকৰ চোতালত হাজাৰ হাজাৰ লোকে ভিৰ কৰে৷ প্রত্যাশা অনুসৰি হিমাই এছিয়ান গেমছত সোণৰ পদক বুটলিবলৈ সক্ষম নহ’লেও ৰূপৰ পদক জয় কৰাক লৈয়ে সুখী তেওঁৰ পিতৃ-মাতৃ আৰু ধিংবাসী ৰাইজ৷ এছিয়াডত ৰূপৰ পদক বিজয়ী হিমা দাসৰ পিতৃ ৰঞ্জিত দাসে জীয়ৰীৰ সফলতাত উল্লসিত হৈ কয়, ‘যদিও তাই গ’ল্ড পোৱা নাই, ছিলভাৰতেই আমি সুখী৷ তাত আমাৰ কোনো আক্ষেপ নাই৷ তাই আগন্তুক অলিম্পিকত ভাল ফল দেখুৱাব বুলি আমি আশাবাদী৷ কাৰণ তাই নিজৰ ৰেকর্ড নিজেই ভাঙি গৈ আছে৷ দিনক দিনে নিজৰ টাইমিং উন্নত কৰি গৈছে৷ মাত্র দুটা বছৰতে তাইৰ খেলৰ বহুত উন্নতি ঘটিছে৷’ হিমাৰ মাতৃ জোনালী দাসে জীয়ৰীৰ সফলতাত সুখী বুলি মন্তব্য কৰি কয়, ‘আমি সুখী৷

তাই সোণৰ পদক নাপালেও উন্নত প্রদর্শনত আমি সুখী৷ তাই আগুৱাই গৈ থাকক৷ আশা কৰিছোঁ তাই অলিম্পিকত সোণৰ পদক কাঢ়ি আনিবলৈ সক্ষম হ’ব৷’ ইপিনে, আজি এছিয়ান গেমছৰ ৪০০ মিটাৰ দৌৰত হিমা দাসে ৰূপৰ পদক অর্জন কৰাৰ পাছত ধিংবাসী ৰাইজ উৎফুল্ল হৈ পৰে৷ ফটকা ফুটাই আবতৰীয়া দেৱালীসদৃশ পৰিৱেশৰ সৃষ্টি কৰে ৰাইজে৷ ‘হিমা দাস জিন্দাবাদ’ ধবনিৰে মুখৰিত কৰা হয় ধিং অঞ্চল৷ আনহাতে, আজি খেলৰ পূর্বে হিমাই পুৱা মাক জোনালী দাস আৰু দেউতাক ৰঞ্জিত দাসলৈ ফ’ন কৰি দৃঢ় প্রত্যয়েৰে কৈছিল আজি মই বৰদৈচিলাৰ দৰে উৰিম, চিতাবাঘৰ দৰে দৌৰিম৷ তোমালোকে নিশ্চিত থাকা, এশ শতাংশ নিশ্চিত থাকা, মই দেশলৈ দেশবাসীৰ প্রত্যাশা মতেই পদক আনিম৷’ লগতে হিমাই পিতৃ-মাতৃক ফ’নযোগে কয় যে তেওঁ ভাৰতবর্ষক জিলিকাই তুলিব৷ এল পি স্কুলত পঢ়ি থাকোঁতেই টাটা ছুম’ক পিছ পেলাইছিল ঃ দৌৰৰাণী হিমা দাসে ধিঙৰ তিনি নম্বৰ কান্ধুলিমাৰী গাঁৱৰ প্রাথমিক বিদ্যালয়ত পঢ়ি থাকোঁতেই এদিন জেদ ধৰি দৌৰি এখন চলন্ত টাটা ছুম’ গাড়ীক পিছ পেলাই সকলোৰে চকু কপালত তুলিছিল৷

এই কথা সদৰী কৰি হিমাৰ মাতৃ জোনালী দাসে কয় যে হিমা এল পি স্কুলত পঢ়ি থাকোঁতে এদিন তেওঁলোকৰ গাঁৱলৈ এখন টাটা ছুম’ গাড়ী আহিছিল৷ গাড়ীখনত তাইৰ সতীর্থসকলক উঠাই কিছু পথ টহল দিয়ে যদিও হিমাক গাড়ীত কিবা কাৰণত উঠোৱা নাছিল৷ ইয়াতেই তীব্র জেদী হিমাৰ স্বাভিমানত আঘাত লাগে৷ টাটা ছুম’খন তীব্র বেগেৰে চলি যোৱাৰ পাছতেই জেদতে হিমাই ছুম’খনৰ পিছে পিছে দৌৰিবলৈ আৰম্ভ কৰে৷ এনেকৈয়ে দৌৰি দৌৰি তাই এটা সময়ত চলন্ত টাটা ছুম’খনক পিছ পেলায় আৰু বিজয়ৰ এমোকোৰা হাঁহিৰে ঘৰলৈ উভতি যায়৷ এই সমগ্র ঘটনাৰ বিষয়ে তাই মাকক অৱগত কৰাত মাকে খঙতে হিমাক সিদিনা পিটিছিল৷

ধিং জৱাহৰ নৱোদয় বিদ্যালয়ৰ শিক্ষক চামছুল হকেই সঠিক পথৰ সন্ধান দিছিল হিমাক ; ধিং পাব্লিক হাইস্কুলত পঢ়ি থকাৰ সময়তে হিমাই ধিঙৰ জৱাহৰ নৱোদয় বিদ্যালয়ত অনুষ্ঠিত এক ক্রীড়া প্রতিযোগিতাত অংশগ্রহণ কৰিছিল৷ খেলৰ বিভিন্ন বিভাগত অংশগ্রহণ কৰা কিশোৰী হিমাৰ খেল অতি সূক্ষ্মভাৱে প্রত্যক্ষ কৰিছিল বিদ্যালয়খনৰ ক্রীড়া বিভাগৰ তত্ত্বাৱধায়ক শিক্ষক চামছুল হকে৷ হিমাৰ দৌৰ দেখি সেইদিনাই জৱাহৰ নৱোদয় বিদ্যালয়ৰ শিক্ষক হকে হিমাক দৌৰ খেলবিধত মনোনিৱেশ কৰিবলৈ পৰামর্শ দি কৈছিল– ‘তুমি দৌৰিবলৈ আৰম্ভ কৰা৷ তোমাৰ দুভৰিত যাদু আছে৷ তুমি সকলোকে পিছ পেলাব পাৰিবা৷’ চামছুল হক নামৰ শিক্ষকজনক লগ পোৱাৰ দিনটোৱেই হিমা দাসৰ বাবে টার্নিং পইণ্ট আছিল৷

খৰি ফালি, বৰশী বাই, মাছ ধৰি, গছত বগাই ভাল পায় হিমাই : অন্য দহজনী ছোৱালীতকৈ হিমা সৰুৰে পৰাই কিছু ব্যতিক্রম আছিল৷ এই কথা সদৰী কৰি তেওঁৰ পৰিয়ালৰ লোকে কয় যে হিমাই খৰি ফালি, মাছ মাৰি, বৰশী বাই, গছত বগাই, ফুটবল খেলি ভাল পাইছিল৷ সৰুৰে পৰা তেওঁ কান্ধুলিমাৰী গাঁৱৰ খেলপথাৰত গাঁৱৰ বিভিন্ন বয়সৰ ল’ৰাৰ লগত ফুটবল খেলিছিল৷ তেওঁ আছিল অতি দৃঢ়মনা৷ যিটো কৰিম বুলি মনতে এবাৰ সংকল্প লয় সেইটো কাম সম্পূর্ণ নকৰাপর্যন্ত শান্তি পোৱা নাছিল৷ জন্মৰ পাছতে জ্যোতিষীয়ে কৰিছিল ভৱিষ্যৎ বাণী : ৰঞ্জিত দাস আৰু জোনালী দাসৰ কন্যা হিমাৰ জন্মৰ পাছতেই হিমাৰ বৰদেউতাক সোণাৰাম দাসে তাইৰ নামকৰণৰ বাবে এজন জ্যোতিষীৰ ওচৰলৈ গৈছিল৷ গণনাৰ অন্তত জ্যোতিষীয়ে সিদিনা কন্যাটিৰ নামকৰণ কৰি কৈছিল– ‘ৰঞ্জিতৰ এই ছোৱালীয়ে অসাধ্য সাধন কৰিব৷ দেশ-জাতিৰ নাম উজলাব৷’



SHARE THIS

No. 1 Web Media in North-East India. Maintained and Published by Saiyad Bulbul Jamanur Hoque on behalf of Save Media Solution (A unit of SAVE).

0 comments: