নীপকোৰ মহা-প্রবন্ধকক গোলাঘাট আৰক্ষীৰ মাৰাথন জেৰা


গোলাঘাট : অৱশেষত গোলাঘাট আৰক্ষীৰ ওচৰত উপস্থিতত হ’ল গোলাঘাটত জলবোমা সৃষ্টি কৰা নীপকোৰ মহাপ্রবন্ধক প্রিয়ব্রত দাস৷ উল্লেখযোগ্য যে যোৱা ২৮ জুলাইত নীপকোৰ দৈয়াং প্রকল্পই পানী এৰি দিয়াৰ ফলত দৈয়াং আৰু ধনশিৰি জলপৃষ্ঠ বৃদ্ধি পোৱাৰ বাবে মহাপ্রলয়ৰ সৃষ্টি হৈছিল গোলাঘাটৰ বিভিন্ন প্রান্তত৷ মেৰাপানী, নুমলীগড়, খুমটাই আৰু গোলাঘাটৰ শতাধিক গাঁৱত বানে হাজাৰ হাজাৰ কোটি টকাৰ সা-সামগ্রীকে ধৰি হাজাৰ হাজাৰ হেক্টৰ কৃষিভূমি নষ্ট কৰিলে৷ ইয়াৰ উপৰি পথ, দলং ভঙাৰ লগতে চাৰিজনকৈ লোকে প্রাণ হেৰুৱাব লগা অৱস্থাৰ সৃষ্টি হৈছিল নীপকোৰ এই অবিবেচক কাণ্ডৰ ফলত৷ এনে অৱস্থা সৃষ্টিৰ হোৱাৰ অন্তত খুমটাই সমষ্টিৰ বিধায়ক মৃণাল শইকীয়াই নীপকোৰ বিৰুদ্ধে গোলাঘাট আৰক্ষী থানাত গোচৰ ৰুজু কৰে৷ অৱশেষত ১২ দিনৰ অন্তত নীপকোৰ মহাপ্রবন্ধক প্রিয়ব্রত দাসে ন্যায়ালয়ৰ অন্তৱর্তীকালীন জামিন লৈ কালি গোলাঘাট আৰক্ষীৰ ওচৰত উপস্থিত হয়৷ গোলাঘাট আৰক্ষীয়ে নীপকোৰ মহাপ্রবন্ধকগৰাকীক প্রায় দহঘণ্টা মাৰাথন জেৰা চলায়৷ উল্লেখযোগ্য যে গোলাঘাট আৰক্ষীয়ে নীপকোৰ মহাপ্রবন্ধকগৰাকীক চলোৱা জেৰাৰ অন্তত কি তথ্য লাভ কৰিলে, সেয়া জানিব পৰা হোৱা নাই যদিও উক্ত জেৰাৰ পিছত বানাক্রান্তসকলে তেওঁলোকৰ ক্ষতিপূৰণ পাব বুলি আশা প্রকাশ কৰিছে৷

SHARE THIS

No. 1 Web Media in North-East India. Maintained and Published by Saiyad Bulbul Jamanur Hoque on behalf of Save Media Solution (A unit of SAVE).

0 comments: