ব্রহ্মপুত্র উপত্যকাত হ’ব বৃহৎ ভূমিকম্প


গুৱাহাটী : ভয়াৱহ বিপদৰ দুৱাৰডলিত আছে অসম৷ নেপালৰ বৰভূঁইকঁপৰ পাছত উত্তৰ ভাৰতৰ লগতে অসমৰ ব্রহ্মপুত্র উপত্যকাত এটা বৃহৎ ভূমিকম্পৰ আশংকা বৃদ্ধি পাইছে৷ আই আই টি, খড়গপুৰৰ ভূকম্পন বিজ্ঞানীয়ে প্রকাশ কৰিছে এই ভয়াৱহ আশংকা৷

আনহাতে, কালি অসমৰ কোকৰাঝাৰ জিলাত অভিকেন্দ্র থকা ভূমিকম্পটোৰ শক্তি দ্বিতীয় মহাসমৰৰ সময়ত জাপানৰ হিৰোশ্বিমাত আমেৰিকাই নিক্ষেপ কৰা পাৰমাণৱিক বোমাটোতকৈ আঢ়ৈ গুণ অধিক আছিল৷ উল্লেখযোগ্য যে বুধবাৰে অসমকে ধৰি মেঘালয়, পশ্চিম বংগ, বিহাৰ, ঝাৰখণ্ড আৰু বাংলাদেশ জোকাৰি যোৱা ভূমিকম্পতকৈ অধিক ভয়াৱহ ভূমিকম্পই জোকাৰি যাব অসমক৷ বুধবাৰৰ ভূমিকম্পটো ৰিখটাৰ স্কেলত আছিল ৫.৫ প্রাবল্যৰ এয়া মজলীয়া ভূমিকম্প৷

কিন্তু এই ভূমিকম্পতে যথেষ্ট ক্ষয়-ক্ষতি হৈছিল৷ ভূকম্পন বিজ্ঞানীৰ মতে ভূমিকম্পটোৰ প্রাবল্য হিৰোশ্বিমাত বিস্ফোৰণ ঘটা পাৰমাণৱিক বোমাটোতকৈ আঢ়ৈ গুণ অধিক আছিল৷ আনহাতে ইয়াতকৈ অধিক প্রাবল্যৰ বৰভূঁইকঁপে অসমক জোকাৰি যোৱাৰ সম্ভাৱনা আছে৷

আই আই টি, খড়গপুৰৰ ভূকম্পন বিজ্ঞানীয়ে নেপালত ২০১৫ চনৰ এপ্রিল মাহত সংঘটিত ভূমিকম্পৰ পাছতে অসমকে ধৰি ভাৰতৰ গংগা উপত্যকা আৰু পূব হিমালয় উপত্যকাত ৯.২ প্রাবল্যৰ এটা বৰভূঁইকঁপে জোকাৰি যোৱাৰ আশংকা থকাৰ সকীয়নি দিছিল৷ বিজ্ঞানীৰ দলটোৱে প্রকাশ কৰা মতে নেপালৰ ৭.৮ প্রাবল্যৰ বৰভূঁইকঁপৰ পাছত ভাৰতৰ ভূগর্ভত আর্থপ্লেটৰ বিস্তৰ ক্ষতি হয়৷ ভাৰতৰ ভূগর্ভত থকা ইণ্ডিয়ান প্লেট আৰু ইউৰেছিয়া প্লেট দুখন তেতিয়া স্থানচ্যুত হোৱা বুলি প্রকাশ কৰিছিল৷

সেই ভূমিকম্পৰ পাছত ইণ্ডিয়ান প্লেটখন ইউৰেছিয়া প্লেটৰ তলত লাহে লাহে সোমাই যাবলৈ লয়৷ ই ভাৰতবর্ষৰ ভূগর্ভ অস্থিৰ কৰি ৰাখিবলৈ আৰম্ভ কৰে৷ ফলত উত্তৰ ভাৰত অধিক ভূকম্পনপ্রৱণ এলেকা হৈ পৰে৷ ইয়াৰ ফলতে ভাৰতত ৯.২ বা তাতকৈ অধিক প্রাবল্যৰ ভূমিকম্প অহাৰ সম্ভাৱনা বৃদ্ধি পোৱা বুলি বিজ্ঞানীৰ দলটোৱে গৱেষণা কৰি তথ্য লাভ কৰা বুলি প্রকাশ কৰে৷ ফলত বুধবাৰৰ ভূমিকম্পটোক বৰভূঁইকঁপৰ আগজাননী হিচাপে আশংকা প্রকাশ কৰিছে ভাৰতৰ ভূকম্পন বিজ্ঞানীয়ে৷

SHARE THIS

No. 1 Web Media in North-East India. Maintained and Published by Saiyad Bulbul Jamanur Hoque on behalf of Save Media Solution (A unit of SAVE).

0 comments: